Ons verwelkom enige foto's - nuut en oud - om ons stamboom te help inkleur. As daar tuis nog 'n ou skoendoos vol skyfies, foto's of negatiewe lê, is dit die moeite werd om dit in te skandeer (nie slegs foto's nie, maar ook dokumente). Vra rond of die bure se seun nie miskien 'n skandeermasjien by die werk het nie, kyk op veilings of tweedehandse winkels vir 'n goedkoop een, of laat dit inskandeer deur 'n professionele besigheid.
(Kliek hier om deur al die foto's in die stamboom te snuffel.)
Dinge om op te let: kies altyd PNG of TIF as formaat vir fotos. Hierdie formate bevat die meeste visuele inligting, terwyl formate soos JPEG kleiner gemaak of "compressed" is. JPEG is piekfyn vir dokumente of vir foto's op die internet, maar as mens iets inskandeer wat miskien skoongemaak moet word - of later as groter formaat uitgedruk moet word, is dit beter om dit ordentelik te doen.
Kyk ook na die DPI ("dots per inch") tydens skandering - dit beteken hoeveel inligting die skandeerder uit die foto moet haal, letterlik hoeveel kolletjies per duim. 900 DPI en hoër is piekfyn. Sulke ingeskandeerde foto's is dikwels baie groot (5MB of groter), maar ons kan sulke groot beelde maklik hier opslaan en terselfdertyd ook 'n kleiner JPEG op die stamboom self aanheg. Dokumente kan wel as hoë resolusie JPEG ingeskandeer word.
Daar is baie video-handleidings op Youtube beskikbaar wat kan help om foto's te restoreer. Solank mens die oorspronklike digitale kopie veilig bewaar, kan enige persoon leer en eksperimenteer. As jy nie die regte sagteware het nie, kan ek kan ook help, as dit 'n foto is wat ons op die stamboom kan en mag gebruik. Ek maak egter nie aanspraak daarop dat ek uiters bekwaam is nie.
'n Voorbeeld van hoe selfs 'n beginner 'n foto kan skoonmaak. Voor (links) en ná (regs).
